MZP Vice President, S.Lalrinawma leh hruaitu thenkhatte chuan nimin khan NBCC Deputy General Manager, DK Sharma chu Chaltlanga-a a office-ah hmu in, NBCC-in Aizawl khawpui chhunga kawng an siam chhe lutuk chu a rang thei ang bera siam tha turin a hriattir a; DK Sharma hian thla khat chhunga siamthat a lo tiam nia thu dawn a ni.
           MZP Vice President sawi danin, MZP hian Aizawl khawpuia NBCC-in kawngpui a siam chhe lutuk hi an vei hle a. NBCC hi khawpui chhung kawng siam thatah hian an hlawhchham a nih chuan, a siam tha thei tur mi dang kutah hlan mai se an duh thu a sawi a; DGM-in thla khat chhunga siamthat a tiam anga hma an lak si loh chuan, MZP chu a che na hle dawn tih a sawi bawk.
           NBCC DGM an hmuhnaa hruaitu thenkhat chauh an kal chhan hi, boruak sosan an hlauh vang a nih thu, S. Lalrinawma chuan sawiin, NBCC chu an thutiam a hlawhtlin leh hlawhtlin loh an nghak phawt dawn tih a sawi. MZP hruaitute hian NBCC General Manager, SD Sharma hmuh an tum a, a lo awm loh avangin Dy. General Manager hi an hmu ta zawk a ni. NBCC hian Bawngkawn atanga Kulikawn inkar leh College veng road, Mission veng, khawpui chhunga kawngpui pawimawh zualte an enkawl vek nia hriat a ni.

Synod Executive Committee-in 'Kum 2008 MLA Electrion hmain Revival Programme neih nise,' tia a lo rel tawh angin, Synod Revival Team-te chuan August-September thla chhung hian Mizoram chhunga Pator Bial chhung Kohhran tinah camping/crusade programme an buatsaih dawn.
 He camping/crusade neih turah hian Synod Revival Committe chuan, Political Education inzirtirna bakah, Kohhran hote thlarau lama nun a harh chuan inthlanna dik leh muanawm a thlen theih ngei an beisei thu an sawi a ni.

Dr.Manmohan Singh kaihhruai sorkar laipui, kum 4 leh thla hnih-a upa United Progressive Alliance (UPA) chuan sorkar fiahna a pal tlang ta a. Nizan dar 7:30-a Election Voting System hmanga vote laknaah sorkar thlawp zawngin member 275-in an vote a, a ep zawngin member 256-in an vote a, hai (abstain) 10 an awm bawk a, vote tla zawng zawng 531 a ni.

Mizoram-in Lok Sabha MP neih chhun, Mizo National Front (MNF) ticket-a tling Pu Vanlalzawma chu nimin tlaia sawrkar fiahna vote thlakna-ah a hai (abstain),  vote a thlak ve lo.
Pu Zawma hi sawrkar fiahna inkhawmah nilengin a tel tho a, vote thlak hunah tan lam a nei lo tih entirnan a dawhkana vote thlakna hmeh tur pathum zinga a eng (yellow) chu a hmet ta a ni. Amah kawmtu chanchinthar lakhawmtute hnenah Pu Zawma chuan he thutlukna hi an Party President, Pu Zoramthanga, Mizoram CM-in thurawn apek anga a siam a ni tih a sawi. Pu Zoramthanga chuan Mizoramah Congress chu an khingpui lian ber a nih avangin Congress kaihhruai UPA sawrkar thlawp zawnga vote thlak chu thil tih chi a ni lo tih sawiin, UPA sawrkar chu a tlak dawn loh hmel bwak avangin, a ep zawnga vote thlak pawh a hun lo a ni, a ti niin DD News chuan atarlang.

Pu HT Sangliana, Bangalore North bialtu BJP MP chuan sorkar bukna-ah hian sorkar thlawp zanwgin vote a thlak dawn tih thuin Zonet Cable zawhna a chhang a. Tuna sorkar buk a nih chhan, Indo-US nuclear deal hi India ram tana tha tur nia a ngaih avangin thlawp a tum tih a sawi. Zonet zawh belhna, Sorkar eptu ber, BJP MP ni chunga BJP duh dan ni lova vote a thlak chuan, mahni party duh dan kalha thil tite hremna dan. Anti Defection Law hmangin MP a nihna atanga ban a ni thei ang em? tih chu chhangin Pu HT Sangliana chuan, ram tana tha turah chuan pawisak a nei lo tih a sawi a, mahni tan lam pawh tilang ngam lova hai emaw, vote thlak loh emaw chu a ngaihdan a ni lo tih a sawi bawk.

July 30 atanga August 3 thlengin Leitzic, Germany-ah Wolrd Baptist Youth Conference neih a ni dawn a, he khawmpui hmang tur hian Mizoram Baptist Church atangin member 23 chu nimin khan an kal.

Hetah hian BCM Choir, Aizawl member 19 kalin, Rev. Dr. KThanzauva, BCM Gen.Secy; Rev.R.Lalrintluanga, MTKP Co-ordinator; Upa C.Ropianga, Home Commissioner(GOM) leh Upa K.Thansanga ten an hruai a ni.

Germany pan turte hian tun Pathianni hian Kolkata an cham dawn a, Serampore College leh Mizo Biak In-ah hun an hmang ang a, July 28 ah Kolkata an chhuah san ang. August 8 khian Mizoram an lo let leh ang.

Inner Line Regulation chungchanga Gauhati High Court-a PIL thehluh a nih duh lohna te, H/C-in Interim Order a chhuah demna leh ILP humhalh zel duhna lantir nan MZP huaihawtin nimin khan Raj Bavan Gate bulah punkhawmna (sitting demonstration) huaihawt a ni.
            He punkhawmna, MZP President Pu C.Lalhmachhuana kaihhruaiah hian Law Minister Pu H.Rammawi bakah, Arunachal Pradesh leh Nagaland-a lamkal te, Mizoram tlawmngai pawl leh political party hrang hrang hruaitu te, leh college zirlai engemawzat an tel.
             He punkhawmnaah hian MZP Gen. Secretary kaihhruaiin an au rual a; "Mizote himna ILP -Hlih kan duh lo", "Mizoram tan ILP - Kan hmang zel dawn", "Mizote chimral tumtu - Kan do zel dawn", "ILP - Mizoram tan" titein an au rual a ni.