Social Welfare Department chuan kum danga a lo tih thin tawh angin, Independence Day pualin Jail, Hospital leh Home hrang hrang-ah te NGO hrang hrang te kaltlangin Home hrang hrangah thilpek a hlan.

Nimin khan MHIP gen.HQRS chuan heng thilpek ah hlan tur bikte chu an pe nghal a, President Pi Rozami leh Jt. Secretary Pi Ropari te chuan TNT-ah Rs. 2,000/-; Hermon Children Home, Durtlang-ah Rs. 2,000/-; Hmangaihna In, Durtlangah Rs. 1,000/- an hlan a ni.

Vice President Pi Ngurmawii Sailo chuan Gan Sabha, Zonuam hnenah Rs. 1,000/- a hlan a; Gen Secretary Pi Lalthlamuani'n Motherless Babies Home, Tuikual-ah Rs. 1,000/-; Secretary Pi Thachhungi'n Spastic Society of Mizoram leh Centre for Peace & Development-ah Rs. 1,000/- ve ve an hlan bawk a ni.

               Independence Day Football Tournament chu nimin khan semifinal khelh a ni a. Tualchhung football dinhmun hniam tak chu foreigner 5 ngawtin AR Lammualah football an rawn pet avangin boruak a kang phah deuh. Mahse, tun hma kum 15 kal ta ang kha chuan mipuiin an bawr phah chuang lo va. Mizoram football dinhmun tawn mek chu a tha tawk tawh lo hle niin a hriat a, chutih rual chuan MFA erawh chuan theihtawp chhuahin tan a la a. Football khelh dan phung pawhin awmzia a nei ta deuh.
                Luangmual FC chuan Liberian player pahnih; striker Aaron Cole leh defender Wright te la lut chungin semifinal an thleng zo lo va. Zawlbuk Real Estate-in foreigner 3 ngawt a lak luhsak, FC Kulikawn erawh chu semifinal an thlenpui thung. Nigerian striker Ola a che ropui hle a, semifinal hmain khelh 3-ah goal 5 a khung a, Nigerian defender Mushiba pawhin a thawh hlawk a, Sudanes midfielder Eisa erawh chuan first team a chang mumal bik lo.
                Foreigner player satliah ni lo, an rama hriat hlawk ve tak zinga miin kan tualchhung tournament an rawn khel ve mai hi Mizoram tualchhung football tan thil chhinchhiahtlak a ni a. Kan veng player, 1st Bn MAP defender  Tv.K.Lalrinchhana ‘K’ leh Dinthar midfielder Tv.Zion Lalramluaha te team-in semifinal an thleng ve ve a, a  lawmawm hle. Chutih laiin Tv.Racy Lalremmawia ‘K’ khelhna SSA leh Luangmuala foreigner khelhpuitu Tv.Zoramthara ‘N’ te erawh chuan semifinal an thleng zo ta lo.

           Beijing Olympic Games chu zirtawpniah hawn a ni a, khawvel hmun hrang hrang atangin infiammi 10,500 vel bawr an pungkhum a. Infiamna hlawm 28 hmangin gold medal 302 an inchuh mek a ni. 
            India chuan infiammi 50 chuang a tir chhuak a. 1996 atang khan Leander Paes chuan tennis-ah bronze medal lain, 2000 khan Karnam Maleswari chuan ritchawiah bronze a la leh bawk, 2004-ah Rathore chuan silai kah hmangin silver a la leh thung a, medal pakhat hawnin India-in hun a hmang thin.
            Kuminah hian India chuan medal pakhat aia tam a lak theih a beisei a. A bikin silai kahah beiseina sang tak an nei a. Athletics-ah pawh infiammi 16 tirin, Olympics awm tawha a tirh hnem ber a la ni.
            A thlengtu China chu US lehpela, a vawikhat nana gold la hnem ber a nih theihan ring hle a. Hetih lai hian gold 40 chuang awmna Athletics-ah China chuan infiammi a nei chau viau a. Tun Games-ah hian 100m-a tlanchak pathum inel tur; Jamaican pahnih, world record siamtu Usain Bolt leh Asafa Powell bakah, American Tyson Gay te  inel tur chu nghahhlelhawm ber pakhat a ni.

         Central YMA leh I&PR Department tangkawp buatsaih, Branch YMA enkawl, veng bil YMA Chanchinbu 2007 chhunga a tha zual thlanna result chu nimin khan I&PR Auditorium-ah puan a ni a. Pakhatna atan Bungkawn YMA Branch chanchinbu 'Bungkawn Tlangau' puan a ni. Pahnihna-ah Ramhlun North Branch YMA chanchinbu 'Maryma' a ni a, pathumna chu Hlimem Veng Branch YMA chanchinbu 'Hlim Khawpui' a ni.

          Heng lawmmante hi I&PR Director Pu L.R.Sailo-in a sem a, CYMA President Pu J.H.Zoremthanga'n lawmpuina leh fuihna thu a sawi. Chanchinbu tha ber hian lawmman tangkafai Rs. 7,000/- ; pahnihna-in Rs. 5,000/-; pathumna-in Rs. 3,000/- dawngin thuziak mawi tak hlan vek an ni.

         Kum 2007 chhunga chanchinbu tha thlannaah hian Aizawl khawpui atangin chanchinbu 35 leh thingtlang lam atangin chanchinbu 24 a lut a, a tha zual 10-ah Branch YMA 12 an lawng. Top 10-a langte chu: 4. Khatla - 'Khatla'; 5.Vaivakawn-'Vaivakawn News'; 6. Chhinga Veng - 'Palai'; 7.Venghlui - 'Venghlui Aw'; 8. Mission Vengthlang - 'Zonunmawi' leh Dawrpui 'Dawrpui News'; 9. Tuikual South - 'Tuikual South Weekly' leh Ramhlun South - 'Ramhlun'; 10. Dawrpui Vengthar - 'YMA Dawrpui Vengthar' te an ni.

 Independence Day lawmna volleyball tournament chu nimin atang khan AR Lammual leh Chanmari West Indoor Stadium-ah khelh tan a ni a. Tun tumah hian volleyball khelh danphung thar 3 Aside (pathum leh pathum) chu mipa first division team 6 ten inel nan an hmang tel nghal dawn bawk a ni.
 Nimin bikah mipa second division match 7 khelh zawh a ni a. Phunchawng SC 3-0 Hmingi VC, Maubawk, Armed Veng 'S' YMA 3-1 LLZ VC, Rem Rem VC 3-0 J.L.H.S, Dawrpui Vengthar VC 3-0 Khatla 'S', Electric Veng 3-2 ITI GSA, Hlimen VC 3-2 Bethlehem Vengthlang leh Kulikawn SC 3-0 Daars VC te an ni.
 Vawiinah mipa khelh chhunzawm a ni ang a, hmeichhia pawhin an khel tan bawk ang. Tun tumah hian mipa lamah second division team 20 chhuakin, group 2-ah then an ni a. Group pahniha a sang ber pahnih hian first division team 6 te zawmin, Independence Day trophy an inchuh tlang dawn a ni.
 Hmeichhe lamah team 12 chhuakin, team 6 ve vein group 2-ah then an ni a. Ruahman danah chuan August 12-a final khelh tum a ni a. Vawiin chawhma dar 10:00 inkhel chhunzawm leh a ni ang a, mipain Lammualah khelh chhunzawmin, hmeichhiain Chanmari West-ah an khel bawk ang.

3 Aside :
 Sports & Youth Services Department leh Mizoram Volleyball Association ten Independence Day tournament an buatsaih mekah hian volleyball khelh dan phung thar entir turin ruahmanna an siam a. Indian Olympic Association leh Indian Volleyball Association-in thurawn an pek angin tun tumah hian mipa first division team 6 te chu, I-Day trophy an inchuh bakah inkhelh danphung thar '3 Aside' hmangin inel tel dawn a ni.
 Khawvelah pawh he inkhelh danphung thar 3 Aside hi khelh tan a la ni mang lo niin tournament buatsaihtute chuan an sawi a. Chutih lai chuan Indian Volleyball Association chuan tihlar tumin hma a la mek a, MVA lamah dan leh hrai engkim thawn tawhin, tun tumah hian a vawikhat nan Mizoramah khelh a ni ang.
 3 Aside-ah hian team khatah player 5 chiah an awm thei a. Player 3-in khelin 2 te chu substitute an ni dawn a. Beach Volleyball kalphung zui deuh ni mah se, volleyball court pangngai an hmang ang a, libero awm lovin set khatah tum 4 an inthlak kual thei a, attack line pawh a awm dawn tawh lo. Service-ah chiah player-ten an awmna an insawm kual (rotation) ang a. Thil dangah chuan awmna hmun hranpa a awm tawh dawn lo va, inkheltu player pathumte chuan an vaw thei vek tawh ang.
 Vawiin hian Chanmari West Indoor Stadium-ah Bungkawn SC leh College Veng SC te chuan Mizorama a vawikhat nan 3 Aside match an khel ang.